Biobide euskal bioenpresak hizlari gisa parte hartu zuen Drug Information Association-en (DIA) Urteko Biltzarraren 45. edizioan. Biltzarra San Diegon (AEB) egin zen ekainaren 21 eta 25 bitartean. Arantza Murianak, Biobideren I+G-ko Kudeaketa zuzendariak, hitzaldi bat eman zuen zebra-arrainaren ereduaren kardiotoxikotasun azterketei buruz eta gizakietan lortutako emaitzekin duen korrelazio onari buruz.

DIA mundu guztiko 18.000 kide baino gehiago dituen profesionalen elkarte bat da, eta produktu farmazeutikoak eta horiei loturikoak aurkitzen, garatzen, arautzen eta banatzen egiten du lan. DIAren urteko biltzarra industria biofarmazeutikoaren alorreko munduko ekitaldi ospetsuenetako bat da. Biltzar horretan urtero elkartzen dira sektore biofarmazeutikoko ikertzaileak, enpresa ordezkariak eta akademikoak.

Biobide aitzindaria da bioteknologiaren arloan, eta medikamentu berrien analisi masiboan eta automatizatuan espezializatuta dago. Bere helburua da merkatuan analisiak egiteko kontzeptu desberdin bat sartzea, eredu gisa zebra-arraina erabilita. Horretarako, Gipuzkoako enpresak instalazio modernoak eta zebra-arrain haztegi bat du, non 150.000 zebra-arrain heldu sar baitaitezke.

Biobidek Laborategiko Praktika Onen (BPL) ziurtagiria eskuratu berri du, eta horri esker, hiru entsegu mota garatu ahal izango ditu: in vivo toxikotasuna, segurtasuneko farmakologia eta farmakodinamia. Ziurtagiri horren bidez bioenpresak zebra-arrainaren ereduaren toxikotasun eta eraginkortasun azterketak egingo ditu BPL ziurtagiripean eta, beraz, azterketa horietan lortutako emaitzak erabili ahal izango dira medikamentuak hiru erakunde arautzaile nagusitan erregistra daitezela eskatzeko: Agencia Española de Medicamentos y Productos Sanitarios (AEMPS), European Medicine Agency (EMEA) eta U.S. Food and Drug Administration (FDA). Gainera, BPL-ren araupean lan egiteko filosofia hori Miramongo Teknologi Parkean egoitza (Donostia) duen konpainia honen I+G+b-ko jarduera guztietara zabal daiteke.