Midatech taldea mundu mailako liderra da nanopartikula sintetikoak ekoitzi eta aplikatzen, eta botika formulazio berriak garatuko ditu MonoSol Rx-ekin batera Bizkaian dauzkan instalakuntzetan, lankidetza hitzarmen baten bidez. Lamina bidezko botiketan espezializatuta dagoen enpresa honek gorputzari botikak emateko modu desberdinak aztertzen ditu eta bera da PharmFilm® teknologiaren sortzailea. Bi konpainien arteko aliantzaren helburua da botika berriak lortzea, produktu bakar batean konbinatuz nanopartikula biobateragarriak eta PharmFilm®, gorputzari botikak emateko teknologia berria.

Hitzarmenaren arabera, Midatech Ltd eta MonoSol Rx enpresek elkarrekin ikertu, garatu eta merkaturatuko dituzte botika-gai berriak, gorputzari nanopartikula terapeutikoak emateko lamina finetan. Ikerketa eta garapena Midatech Biogune S.L.-n egingo da, talde britainiarrak Bizkaiko Teknologi Parkean dauzkan instalakuntzetan alegia.

Midatech Group Ltd. UK mundu mailako liderra da nanopartikula biobateragarriak diseinatu, sintetizatu eta ekoizten, eta hauek gero ezaugarri, funtzio eta aplikazio desberdinak dituzten produktu ugari sortzeko erabil daitezke hainbat industri sektoretan, esaterako, bizitzaren zientzietan, elektronikan edo kimikan. Midatech Ltd. enpresa 2000. urtean sortu zen eta Abingdon-en (Oxford, Erresuma Batua) dauka egoitza. 2005etik, konpainiak ekoizpen instalakuntza bat – Midatech Biogune S.L. – dauka Bizkaian, eta instalakuntza berriak prestatzen ari da Basilean (Suitza) martxan jartzeko.

Bere aldetik, MonoSol Rx enpresa farmazeutiko espezializatua da, Portage-n (Indiana, AEB) dauka egoitza, eta tresna propioa garatu du gorputzari botikak emateko azkar disolbatzen diren laminen bidez. Teknologia honen izena PharmFilm® da, eta pazientearen onerako diseinatu dute, egun merkaturatzen diren botiken egokitasuna, eraginkortasuna eta betekizunak hobetuz.